Pas Australisë, edhe Europa në alarm: Fëmijët dhe teknologjia nën lupë – a duhet ndaluar përdorimi i rrjeteve sociale
Vendimi i Australisë për të ndaluar përdorimin e rrjeteve sociale nga fëmijët nën moshën 16 vjeç ka ndezur një debat global për ndikimin e teknologjisë tek të miturit. Gjurmët e këtij debati po ndihen gjithnjë e më shumë edhe në Europë.
Në Gjermani, Shoqata Gjermane e Pediatrisë (DGKJ), me mbështetjen e organizatave të tjera shëndetësore, ka publikuar së fundmi udhëzime të reja, ku theksohet se:
Fëmijët nën moshën 3 vjeç nuk duhet të ekspozohen fare ndaj ekraneve.
Përdorimi i teknologjisë për fëmijët më të mëdhenj duhet të jetë i kufizuar dhe nën mbikëqyrjen e prindërve.
Për adoleshentët, rekomandohet jo më shumë se dy orë akses në internet në ditë.
Edhe në Britani, Komisionerja për Fëmijët, Rachel de Souza, ka bërë thirrje që prindërit të jenë më të vendosur në vendimet që marrin për përdorimin e telefonave, duke vënë përparësi mirëqenien e fëmijëve para dëshirës për t’u dukur “miq” me ta.
Një sondazh i fundit i YouGov ka zbuluar se 23% e fëmijëve të moshës 8 deri në 15 vjeç kalojnë më shumë se katër orë në ditë përpara ekranit, ndërsa 45% kalojnë mbi dy orë.
Ekspertët paralajmërojnë për pasoja të shumta nga përdorimi i tepërt i teknologjisë, duke përfshirë probleme me gjumin, përqendrimin dhe marrëdhëniet sociale. Por jo të gjithë janë pro ndalimeve të rrepta.
Dr. Stefanie Höhl nga Universiteti i Vjenës thekson se nëse përdoren në mënyrë të kontrolluar, mediat dixhitale mund të jenë përfituese për fëmijët. Ajo thekson se rëndësi ka mënyra dhe përmbajtja e përdorimit, jo pajisja në vetvete.
Një tjetër studim, i kryer nga Universiteti i Floridës së Jugut me mbi 1,500 fëmijë të moshës 11–13 vjeç, tregoi se:
78% e tyre zotëronin një telefon inteligjent;
Vetëm 21% e tyre kishin simptoma të ankthit ose depresionit, krahasuar me 26% të atyre pa telefon;
Ata që kishin telefon raportonin më shumë kohë të kaluar me miqtë në mënyrë fizike.
Megjithatë, studimi paralajmëron se përdorimi i shpeshtë i rrjeteve sociale lidhet me rritje të problemeve me gjumin dhe shëndetin mendor. Ekspertja Jess Maddox nga Universiteti i Alabamës thekson: “Nuk është telefoni ai që dëmton, por mënyra se si përdoret – veçanërisht rrjetet sociale.”
Në një kohë kur ndarjet mes ndalimit dhe edukimit dixhital janë të thella, një gjë mbetet e qartë: teknologjia kërkon një qasje të balancuar. Prindërit, mësuesit dhe politikbërësit duhet të punojnë së bashku për të siguruar që fëmijët të jenë të mbrojtur, por edhe të pajisur me aftësitë për të përfituar nga avantazhet e botës dixhitale.
